A hora dos contos é un proxecto de animación á lectura no que nos visitan diferentes artistas coas súas maletas cargadas de historias, co fin de fomentar entre o público máis pequeno o gusto polos libros e a lectura. Nesta ocasión visítanos o contador Caxoto co espectáculo Miña terra meu lar. 

Espectáculo

Miña terra meu lar 

Un barrendeiro (ou como el prefire que lle digan mozo da limpeza) que pasa polo escenario aproveita que o espectáculo aínda non vai comezar para esixir que se deixe de tirar cousas ó chan. Está farto de recoller chicles, papeis, pano dos mocos e avoas en bo estado de uso. Farto de que ninguén recicle o lixo. Farto de pisar cacas de can!.

A partir deste comezo un pouco excéntrico o seu discorrer escénico irá virando cara un tono máis amable dende o que a través de contos, dinámicas e cantigas sensibilizar en contidos relativos ao coidado ambiental.

Un espectáculo lúdico pero tamén didáctico no que aprender a coidar o noso planeta como se fose a nosa casa… o noso lar.