A sesión de Contos Dakí do mes de febreiro coincidiu coa celebración do Día de Rosalía, polo que non podíamos deixar pasar a ocasión para que os versos da poeta se colasen entre as historias que desta vez nos trouxo Celso Sanmartín.
“Vendéronlle os bois,
vendéronlle as vacas,
o pote do caldo
i a manta da cama”
Así comeza o poema “Pra a Habana”, e nesas primeiras liñas están contidos algúns dos elementos que eran os piares da vida dos labradores: a importancia que tiñan as vacas e bois para a familia, o caldo como alimento contra a fame, a manta como acubillo… E todos eles foron levándonos con humor e tenrura duns contos a outros, a través de historias vitais recollidas ao calor de lareiras e tabernas. O peche puxémolo a ritmo de pandeireta cunha pequena copla e un “Viva quen baila!”
