Con motivo do 8 de marzo, Día Internacional da Muller, a biblioteca participou xunto coas entidades que forman parte de Social Calvario —a rede de organizacións do barrio que traballan no ámbito da inclusión social con colectivos en situación de vulnerabilidade— nun acto comunitario celebrado na Praza da Memoria.
A xornada consistiu nun encontro aberto para reivindicar a igualdade e os dereitos das mulleres, especialmente aquelas que, pola súa situación social, de saúde ou pertenza a minorías ou colectivos en risco de inclusión, sofren con frecuencia unha dobre discriminación.
A actividade central consistiu na decoración colectiva duns pratos nos que as participantes escribiron testemuños sobre experiencias de discriminación vividas no día a día. Outros pratos enchéronse de lemas, palabras reivindicativas e símbolos do 8M, converténdose nun mosaico de denuncia e empoderamento feminista. Durante o acto tamén se despregou un gran lazo morado no céspede da praza e procedeuse á lectura dun manifesto común elaborado polas entidades participantes.
Manifesto 8M. Un Só Barrio, Todas as Mulleres
As mulleres que damos vida a Social Calvario unímonos nun berro común. Non somos grupos illados, somos unha rede de veciñas, profesionais e usuarias que entendemos que a exclusión ten un compoñente de xénero que non se pode ignorar.
Saímos á rúa para poñer ne valor a vida daquelas mulleres que camiñan polas marxes: as que conviven coa enfermidade e a discapacidade, as que loitan contra a adiccións, as nenas que medran en contornos de vulnerabilidade, as maiores que resisten ao esquecemento do Alzhéimer ou do Párkinson e as mulleres de etnia xitana que sosteñen con orgullo as súas comunidades. A todas nos atravesan as mesmas dificultades: un estigma que nos sinala, unha sociedade que nos axexa e unhas barreiras sociais que parecen invisibles pero que frean cada un dos nosos pasos.
A nosa realidade diaria está marcada polo esforzo invisible. Somos as que coidan e as que precisas sen coidadas, as que buscan unha oportunidade laboral fronte ao prexuízo e as que defenden a súa dignidade en contextos de extrema precariedade. Hoxe queremos transformar ese estigma en recoñecemento. Porque non somos vítimas pasivas, somos mulleres resilientes que, malia a exclusión estrutural, seguimos tecendo o apoio mutuo que sostén este barrio.
As nosas esixencias:
Políticas de coidado reais. Que o peso de atender a persoas maiores, menores ou con discapacidade deixe de ser unha obriga invisible das mulleres e pase a ser un compromiso público e comunitario.
Servizos públicos sen prexuízos. Esiximos unha atención social e sanitaria libre de estigmas para as mulleres con adicións ou problemas de saúde mental, garantindo o seu dereito a unha vida digna e se xuízos.
Igualdade de oportunidades interseccional. Programas de emprego e educación que teñen en conta a nosa diversidade cultural e as nosas capacidades diferentes, eliminando o racismo e a discriminación.
Espazos de seguridade. Recursos de protección efectivos para as mulleres en maior risco de exclusión, que garantan a nosa integridade física e emocional en todos os ámbitos.
En Social Calvario non sobra ninguén. Hoxe berramos polas que non están, polas que non poden berrar e polas que, día tras día, demostran que a resiliencia ten nome de muller no noso barrio.
O pasado venres festexamos, xunto coas entidades sociais do Calvario, a festa dos Maios, unha tradición que seguimos a coidar con ilusión. Foi unha xornada de encontro, colaboración e festa, aberta tamén a toda a veciñanza.
Durante parte da mañá adicámonos á elaboración dos nosos maios, catro en total, cada un deles único e feito con coidado e creatividade. Utilizamos fiúncho, xesta e flores para construír estas estruturas que simbolizan a chegada da primavera e que, ademais de representar o traballo colectivo, transmiten valores de respecto polo medio ambiente e a identidade cultural.
Ao rematar a exposición dos maios, a celebración continuou coa actuación das pandeireteiras do grupo Delicias de Trasmañó, que nos agasallaron cun repertorio cheo de ritmo, tradición e alegría.
A festa dos Maios é unha oportunidade para fortalecer lazos entre entidades, veciñanza e institucións, ao tempo que poñemos en valor o noso patrimonio cultural e fomentamos a creatividade e a colaboración comunitaria.
Social Calvario somos: Biblioteca Pública Municipal Xosé Neira Vilas - AFAGA Alzheimer - APAMP - ASEM Galicia - Asociación Érguete - Fundación Érguete-Integración - Asociación ARELA - DOWNVIGO - Asociación Parkinson de Vigo - CS Rivera Atienza-Xunta de Galicia - Fundación Secretariado Xitano - Igualarte - UTS Concello de Vigo
Ao longo das últimas semanas, na nosa biblioteca tivemos o pracer de acoller cinco visitas moi especiais organizadas para persoas usuarias da asociación AFAGA, dedicada ao acompañamento de persoas con alzhéimer. Durante estes encontros, fixemos unha viaxe emocional e musical pola vida dunha figura inesquecible: Pepa Flores, máis coñecida como Marisol.
Cada sesión foi unha oportunidade para achegármonos á muller detrás do mito. A través de conversas, imaxes e fragmentos das súas películas, descubrimos a súa historia, a súa evolución artística e tamén o seu lado máis humano e comprometido. Compartimos lembranzas, emocións e moita música.
Un dos momentos máis fermosos foi cando todas as persoas participantes cantaron con entusiasmo grandes éxitos como La vida es una tómbola, Tengo el corazón contento ou La Tarara. As melodías de Marisol axudaron a conectar co pasado, a estimular a memoria e, sobre todo, a crear un espazo de encontro cálido e cheo de vida.
Agradecemos de corazón a AFAGA por contar connosco e a todas as persoas participantes por facernos partícipes dunha experiencia tan enriquecedora e emotiva. A biblioteca segue a ser un lugar para a memoria, a cultura e o afecto compartido.
No marco do programa Promociona da Fundación Secretariado Gitano, tivemos unha xornada especial de con motivo do Día da Poesía, na que creamos un lapbook cheo de xogos e actividades literarias moi divertidas. Nenas e nenos, xunto ás nosas compañeiras da Fundación, exploraron diferentes formas de expresión poética: dende os caligramas, onde as palabras se convertían en imaxes, ata os acrósticos, onde cada letra dunha palabra escondía un segredo literario.
Tamén probamos o black poetry, onde transformamos libros vellos en poemas cheos de colorido e de imaxes. Por último, creamos os nosos propios haikus, escoitando os sons da natureza e plasmándoos en versos curtos e fermosos. Foi unha actividade moi creativa e chea de sorpresas.
A xornada permitiu que a rapazada se mergullase no mundo da poesía dun xeito lúdico, facendo os seus propios xogos poéticos, aprendendo e xogando ao mesmo tempo.
Para conmemorar o Día da Muller as entidades que formamos o colectivo Social Calvario celebramos onte no museo MARCO unha mesa redonda na que mulleres que pertencen a distintos colectivos en risco de exclusión expuxeron as diferentes realidades á que se enfrontan no seu día a día. Araceli (Párkinson Vigo), Claire (Érguete), Nora (Fundación Secretariado Xitano), Carmen (Fundación Érguete), Consuelo (Afaga) e Ana (APAMP) foron as encargadas de dar voz a mulleres que sofren moitas veces unha dobre discriminación: investigacións e tratamentos médicos que obvian o xénero das doentes e que as prexudican ao tomar sempre como referencia o doente masculino, estigmas e prexuízos sociais aos que se expoñen as mulleres xitanas, trans ou drogodependentes, a importancia do acompañamento e a sororidade ou as dificultades no acceso a algo tan básico como a comunicación no caso das persoas con parálisis cerebral, foron algúns dos aspectos sobre os que puidemos reflexionar neste interesantísimo encontro.
Para finalizar o acto, levouse a cabo unha concentración nas escaleiras do MARCO, na que se fixo a lectura do poema "Somos mujeres" de Elvira Sastre, co acompañamento á guitarra de Israel, que pechou a xornada cunha emotiva peza musical.
"Miradnos. Decidimos cambiar la dirección del puño porque nosotras no nos defendemos: nosotras luchamos." Elvira Sastre
O pasado 27 de febreiro festexamos o Día de Rosalía de Castro (23 de febreiro) na nosa biblioteca, recibindo a visita da Fundación INTEGRA. Foi unha xornada especial, na que compartimos con este colectivo a nosa admiración pola autora galega. A actividade principal consistiu na creación dun collage con imaxes de Rosalía, que serviu para dar a coñecer a súa figura e obra, á vez que traballamos a creatividade e a expresión artística.
A Fundación INTEGRA, comprometida coa integración social e laboral das persoas con discapacidade intelectual, participou con entusiasmo nesta actividade, vivindo a experiencia de forma moi significativa.
Foi un día de celebración e aprendizaxe, no que a literatura galega uniu a persoas de diferentes realidades en torno a un obxectivo común: a integración e a cultura.
