Olladas sen receos. A pobreza non se elixe. Exposición fotográfica

Andrés Terraza

Con motivo do seu 25 aniversario, a Fundación Érguete-Integración pon en marcha Olladas sen Receos, unha campaña que sitúa o foco nas persoas que viven baixo o limiar da pobreza e en situación de rúa nas nosas cidades e vilas.
Mediante esta acción, a entidade pretende denunciar a vulnerabilidade e falta de recursos coas que deben lidar as persoas sen fogar, pero tamén reprobar as miradas de desconfianza e temor coas que a sociedade contempla a quen sobrevive nas condicións máis difíciles. Trátase de derrubar prexuízos e estereotipos e comprender que, na maioría das ocasións, son circunstancias fortuítas as que levan a estas persoas a situarse nas marxes dunha sociedade que as penaliza dobremente, culpabilizándoas da situación que atravesan.
A través da exposición fotográfica de imaxes do artista afincado en Vigo Andrés Terraza, temos a oportunidade de asomarnos ás difíciles historias de supervivencia daquelas persoas que viven na rúa, en terra de ninguén. Sete fotografías que ofrecen unha visión directa e sen prexuízos de estampas demasiado habituais nas nosas rúas, acompañadas de breves textos que nos permiten ollar sen receos esa realidade á que normalmente damos as costas.

horario

Horario de apertura da biblioteca.

Facebook

Twitter

Ubicación

Biblioteca Pública Municipal Xosé Neira Vilas